الحسد.....
Posted on January 27, 2018 by Marwan Messallam, One of Thousands of Life Coaches on Noomii.
الموضوع شائك ومتصل بموروثات يعتقد خطأ انها دينيه ولكن كلامي عنه من وجهه نظر تحسين جوده الحياه وملامسة امور دينيه كان حتمي
(3jan2018)MarwanLifeCoach
الحسد. ….
علي عكس كل اللي معظمنا عارفينه عن الحسد ..
للاسف فاهمين الموضوع غلط وبنظلم ناس كتير ونقول دول حساد ونقعد خايفيين ونخبي حاجات عشان مانتحسدش.
والموضوع غير كده خالص سواء دينيا او دنياويا…
الموضوع صعب وشائك ومحتاج تفتيح مخ شويه وانا مش مرتب الكلام بس….
طيب اللي حصل كالآتي:
معدي قدام التلفزيون لقيت برنامج #ست_الحسن بيتكلمو عن الحسد .
فلفتو نظري للكلام في الموضوع ده ..معظم المداخلات بتدعم الفكره السائده انو فلان قال كذا ف العربيه اتخبطت وفلان شاف كذا فالبيبي طلع مريض….و..و….و
انا هدخل في الموضوع …
اولا عايز افرق بين حق الشخص في الخصوصيه علي كل المستويات.
يعني اللي مش عايز يقول انه هيحج واللي مش عايزه تقول انها حامل واللي بيخبي اي حاجه ده حقه وهو حر. والمفروض مانزعلش منه خالص دي حريه شخصيه او خصوصيه او اي سبب. …
حاجه مهمه هنا ناس كتير بعتت في الكومنت عن واستعينو علي قضاء حوائجكم بالكتمان.
واحد القراء حتي اتهمني بتجاهل الحديث ..
اطلاقا الحديث متطابق جدا مع المعني وله سبب فمثلا
لو عندي فكره اختراع او مشروع وفضلت اقول للرايح والجاي اكيد ممكن الفكره تتسرق مني .. فمن حقي اني احفظ اسراري .
اما في حال سرقتها لاني اظهرتها فطبعا ده حسد واللي سرقها قام بفعل وليس فقط النظر والحقيقه ان الحديث بيدعم كلامي وكلام العلماء وليس العكس..
ووبيدعم الفكرتين فكره حقي الاصيل في اني اخبي شئ ما وفكره ان اللي هيعرف قد يحسدني بالفعل وليس بالعين..
ونفرق بين انه بيخبي فقط بدافع الخوف انه هيتحسد بالعين والشعاع وخلافه.
..
مش عايز ازود في العمق الديني لكن دي درجه من درجات الشرك ..
طيب ..
انا مش رجل دين ولا متخصص في اللغه لكن اللي عايز يبحث ورايا أهلا وسهلا ويراجعني لكن المصادر هي دينيه ولغويه.
والاهم من الاتنين هو إعمال العقل اللي احنا مامورين من ربنا بتشغيله في الآيات… افلا يتفكرون… افلا يتدبرون.. افلا يعقلون ..
الحسد بقي ايه هو؟ ؟ ؟ ؟
في اللغه العربيه الحسد هو تمني زوال النعمه.
بس كده.
يعني الحسد يا جماعه بيتوقف عند التمني.
شخص بيتمني ان حضرتك تخسر شئ معين مجرد تمني فقط فقط لا يؤثر اطلاقا فعليا علي زوال الشئ ده منك .
طب امتي يكون في خطر ؟ ؟ ؟
لو الشخص الحاسد قرر انه يزيل النعمه دي بفعل يده .
امثله :
واحد سايق عربيه 3 شافوه..
الاول : ما شاء الله عربيه حلوه ربنا يزيد.
ومشي لحال سبيله .(مفيش ضرر)
الثاني: عربيه حلوه اوي مايستهالش دي لازم كانت تبقي معايا . (حاسد) .
ومشي لحال سبيله.(مفيش ضرر…)
الثالث: عربيه حلوه قوي انا هكسر عليه هلبسه في عمود او استفزه لسباق وعند الحفرة هضيق عليه الطريق يا يتقلب يا العربيه تتكسرر … (عنصر تخطيط لشر بالفعل ).
وحصل فعلا ده بقي الحاسد اللي احنا بنستعيذ بالله منه في قل اعوذ برب الفلق… الآيه بتقول من شر حاسد اذا حسد
وليس من الحسد في حد ذاته.
لكن اذا شخص حسد فنستعيذ من شره هو الحاسد كشخص وليس من الحسد .
هو ده اللي الدين والقرآن بيتكلم عنه واللي كل ماتقول لحد مفيش حسد بالنظر والعين محدش بيبص لحد بعينه يطلع شعاع يخبطه ده مش وارد.
فيرد عليك ويقوول لا ده مذكور في القرآن .. ايوه طبعا بس مش بالمعني اللي احنا فاهمينه خالص.
اذا ملخص :
انك تخبي شئ ما ده حق اصيل وحريه شخصيه ايا كان السبب.
الحسد هو تمني ويقف عند حد التمني لزوال النعمه فقط.
الاستعاذه بالله ليست من الحسد في ذاته وانما من الحاسد كشخص اذا قام بفعل مادي .
مفيش شعاع بيطلع من العين ..
طيب ..
ازاي بقي لما فلان شاف العربيه اتخبطت في ساعتها ولما فلانه جت عندي البيت الفازه اتكسرت اول ما بصتلها..
يا جماعه ده ابتلاء من ربنا عشان يختبرنا اذا كنا هنظلم فلانه دي او فلان ده ولا لا ونقول هو السبب وخلو بالكو ده نوع من الشرك.
زيه زي الايمان بالخرزه الزرقاء والكف وخلافه.
ارجو منكم جميعا الرجوع عن ظلم الناس دي والي بطل يكلم حد او بيخاف منه يرجع يكلمه فورا ويستغفر ربنا ….
طبعا عايزين تفسير ولو متواضع للعربيه اللي اتخبطت والفازه اللي اتكسرت من غير ما حد يلمسها.. صح؟
تمام
مثال للظلم تامل معي مثالين للظلم ..
سياره فارهه سريعه جدا جدا يقودها شاب صغير السن جدا وغالبا واخد المفاتيح بدون علم الاسره ..
ماذا تتوقع ان يحدث ؟ ؟ ؟ ؟
اكيد حادث ..
ما ذنب جارنا المحترم الذي راي السياره يوم شراءها والذي قلنا عندما رآها ربنا يستر بقي عيون الناس كانت هتاكلها .
اترك الاجابه عن سبب الحادث.
– عيون جارنا اللي عينه مدوره
-فشلي في تربيه ابني واصبح حرامي .
-عارف ان ابني مش متربي وحرامي وكنت مهمل في الحفاظ علي المفتاح.
المثال التاني
الشغاله وقعت الفازه وانا مش شايفاها خافت مني رغم اني طيبه ومبزعقلهاش .
الفازه حصل فيها شرخ بسيط غير مرئي.
الشغاله حطتها مكانها ولا مين شاف ولا مين دري…
زياره بليل من واحده عينها مدوره
اول ما دخلت الباب اترزع من الهواء الفازه اتشقت نصين من موجه الرزعه.
حلل
سبب شق الفازه نصين؟
-انها كانت مكسوره اصلا والهوا ورزعه الباب عملو موجه صدمه غير مرئيه
-شعاع طلع من عين الزائره لما شافت البيت الجديد
-عفريت كان معدي خبط فيها غصب عنه..
يا جماعه في حاجات كتير قوي لا مجال للتفصيل فيها
كلام ربنا واضح وصريح
-الاستعاذه بالله هي العلاج بالاساس وفقط وهي العلاج والحمايه الوحيده.
- من شر الحاسد اي الشخص اذا حسد اي اذا تمني في قلبه المريض زوال النعمه …
فول استوب
اخر حته
في سوره الكهف يا ريت نقرأها تاني بتمعن .
الراجل اللي قال ان جنينته لن تفني ابدا الايه صريحه ربنا بيقول انه مشرك. ..
والتاني بيقوله لولا ان دخلت جنتك قلت ماشاءالله .
من هنا جت ماشاءالله الواحد يقولها علي نفسه ومش للحسد طبعا ميمنعش نقولها ليل ونهار .
وفي الحسد .
كلام ربنا حلو في اي وقت لكن بشرح علاقتها بزوال نعمه القصه في سوره الكهف.
وزوال النعمه كان لشرك الرجل بالله ومش بسبب حسده لنفسه .
عارف ان الموضوع صعب شويه..
ارجو انه يتفهم لان ناس كتير مظلومه بسبب اننا بنقاطعهم وننكرههم لمجرد اننا اعتقدنا انهم سبب في شئ وحش حصلنا.
وناس تانيه حياتها جحيم بسبب الخوف من الحسد ومن كل شئ .
وناس تانية حياتها جحيم بسبب نظرتنا ليهم وخوفنا منهم عليةانهم حساد وعينهم مدوره….
وناس بترجع مشاكلها كلها في الفشل للحسد .
والسبب الحقيقي هو عدم العمل والسعي والاجتهاد.
عيشوا يا جماعه واتبسطو وافرحووو واجتهدو
شوفو فيلم قنديل ام هاشم كده تاني ..
بتمعن شويه
واطلعوا من الافكار والموروثات الغلط اللي للاسف الدين متهم فيها وهو برئ تماما. …
نلتقي بعد الفاصل.
………………………………………..
#مروان_لايف_كوتش
#MarwanLifeCoach
